بحبك عايز أبوح لك عايز أقول أسرارى فى هوايا
لكن يبعدنى عنك حبك لواحد غيرى
لو قلت فى يوم أقولك يزعل منى ضميرى
وانا كل منايا انتى وبس يا أغلى الناس
خايف لحبى ليكى يتحس مابين الناس
ما أنا بحبك وعلى نفسى باعترف
خايف لحبى ليكى يظهر ويتعرف
وتاخدى على خاطرك منى
وتبعدى نفسك عنى
وانا ماقدرش يوم يعدى
من غير ما أشوفك يا حبيبتى
ده أنا قلبى سابنى وراح معاكى .... يتهنى بيكى وبقربك
وكل ما أتقابل وياكى ...... تحكيلى عن حاله حبك
بتعذبينى من غير ماتشعرى ولا تدرى
وأجى أمشى تقوليلى ليه لسه بدرى
عايزانى أسمع تانى ايه؟
حبيبتى بتحب غيرى ليه؟
مش عايز أسمع
مش قادر أسمع
هو انتى يعنى هاتقولى ايه؟
هاتحكى عنه...... عن حياتك وعن حياته
هاتحكى عنه...... وذكرياتك وذكرياته
وكل أمنياتك طبعا هى أمنياته
وأنا قاعد اسمع كل كلمه بتقوليها
قاعد أسمع كل كلمه حب تردديها
والدمع يجرى غصب عنى من عنيا
ده انا حبى ليكى شىء ماهواش بين ايديا
وألتفت وبسرعه أخبى دمعتى عنك وأدارى
خايف تحسى باللى جوه فى قلبى ولهيبى ونارى
وفى أخر الحكايه........ لا أخرها ايه؟
دى هى دى البدايه....... طب لسه ايه؟!!
لسه هاشوفها تانى وتحكيلى عن حبيبها
تحكيلى انه جالها وفى يوم قرر يسيبها
أو حتى هى تسيبه لازم ماهو ده نصيبها
ساعتها بس هاقدر أقول كل اللى جوايا
ساعتها بس هايزيد فى قلبى فرحى وهنايا
وأدينى قاعد وحيد وفاضى
عايش حياتى سعيد وراضى
لحد ماييجى يوم عارفه وباستناه
هاتيجى وتقولى فيه كل اللى باتمناه
