احساس بظلم عايش معايا
احساس غريب
احساس مريب
حسيته امتى وازاى وليه؟
معرفش بس اتعودت عليه
من صغرى عايش طفوله قاسيه
حاسس كأنى فى سفينه راسيه
حالفه برحمه قبطان قديم
ماتمشى يوم وتسيب مكانها
وعايزه قلبى يكون رحيم
وأكبر وأسوقها مابين جيرانها
وأهو..كبرت جوه السفينه
بس الرياح قاسيه وحزينه
رياح غدر وخيانه ..... رياح خايفه وجبانه
وأنا زيها خايف جبان
عايش فى زل .. عايش مهان
عايش وجوه فى قلبى حاسس بانكسار
عايش كأنى فى ليل ماطلعلوش نهار
والرحمه ماتت جوه قلبى من زمان
وأدى السفينه واقفه وراسيه فى المكان
عشمك عليا يا سفينه طلع فاشوش
خليكى واقفه مستنيه واحد ما أعرفوش
ييجى يشدك من مكانك يوصلك بر الامان
ويصحى جوايا المشاعر اللى ماتت من زمان
وأمانى نفسى فى يوم أشوفها متحققه
لسفينه راسيه مكانها واقفه مشققه
عارفين مين السفينه..
واللى دايما حزينه..
هى بلدى وبلدك
هى أرضى وأرضك
هى عرضى وعرضك
بلدى اللى مظلومه ومشنوقه
بلدى اللى غلبانه ومخنوقه
بلدى اللى مهدور دمها ومتخانه
بلدى اللى مفروض تبقى بينا أمانه
ضاعت حقوقك يابلد
ضاعت ومات فيكى الولد
ولدك.. بطل أحلامنا
هاييجى يمحى ألامنا
مات الولد يا خوانا
مات حتى قبل ما يتولد
مات يابلد .. مات يابلد
وأهى دى حكايتى
ودى حكايه كل شاب عايش فى بلدى
عايش حزين عليها ومش قادر يصلحها
نفسه يحركها خطوه من مطرحها
نفسه يريح نفسه بس مش قادر......
يريحها.
