مش عارف ..

أنا تايه خالص مش عارف .
العيب فيا ولا فى مين .
نفسى أتغير بقى مش عارف .
ولا عارف رايح على فين .
ماشيه الدنيا وماشى معاها.
كده ع الحال ده بقالى سنين.
وياترى أخرتى إيه وياها .
هابقى سعيد ولا أبقى حزين.
مش عارف على فين وخدانى.
يمكن هاتطلعنى لفوق .
وتودينى لعااااالم تانى.
يابنى إصحى .. ومن حلمك فوق.
بطل أوهامك جاك نيلة.
ده أنا مليت م الزوق وياك.
ده لو حظك يتحسن ليلة.
تانى ليلة هايمشى وينساك.
عيشها وحاول ما تفكرش.
وإياك تعمل ليها حساب .
ياما غيرك حاول ماعرفش.
ماهى مليانه وحوش وكلاب.
إسمع يابنى وخدها نصيحه.
الدنيا دى مش ليا وليك .
وماتبقاش كده واد تلقيحه.
لأنها عمرها ماهاتديك.
عمرها أبدا ما هاتديك...

بابا ..

يا أغلى الناس على قلبى .
باقول الأه دى من قلبى .
باقولها ساعات تريحنى .
وأحيانا يموت قلبى .
يا أغلى الناس على قلبى ..

بتضحك .. تضحك الدنيا .
دى ضحكة من حياة تانيه.
ولو شيلت الهموم ثانيه .
بتكوى النار صميم قلبى.
يا أغلى الناس على قلبى..

حياتك غالية يا والدى .
وكانت أغلى ما عندى.
لكن بقى ربنا إختارك.
ماتغلاش والله على ربى.
يا أغلى الناس على قلبى..

واحشنى يا بابا يا حبيبى.
واحشنى ومين هنا دارى بى.
واحشنى حضنك الدافى .
وضحكة تطفى نار قلبى.
يا أغلى الناس على قلبى ..

يارب يا بابا باتمنى .
تكون مرتاح وفى الجنة .
وأموت بقى بدرى وأجيلك.
ساعتها النار تسيب قلبى .
يا أغلى الناس على قلبى....

لحظة واحدة ..

لحظة واحدة يا حبيبى .. لحظة واحدة .
قبل ماتمشى باقولك .. لحظة واحدة .
دى لحظة تفرق فى الحياة .
اللحظة مابين لأ .. وأه .
ده العمر عدى .. فى لحظة واحدة .
مابين عناااااد .. وبين مناهدة .
فى لحظة واحدة ..

كل اللى طالبه منك إنت .
لحظة واحدة تكون مش انت .
تغير الطبع اللى فيك .
وتبقى واحد غيرك إنت .
للحظة واحدة ..

عايز أقولك كل حاجه.
ونتفق على كل حاجه .
وننهى مابينا بهدوووء.
ده أنا كنت غرقاااااان فى السذاجه.
لحظة واحدة..

لو هاتمشى إستنى ثانية .
عايز أقولك حاجه تانية .
عايز أقولك إنى بعدك .
هاعيش وهابقى ف أحلى دنيا .
لحظة واحدة ..

لو كنت فاكرنى هاعانى .
وأعيش فى حيرة وذل تانى .
أحب أقولك .. مش هايحصل.
مش هافكر فيك ثوانى .
ولا لحظة واحدة..

خلص كلامى وإعتراضى.
واللى فات ده هايبقى ماضى.
هامحيك تماما من حياتى .
ودلوقتى .. إمشى من قصادى.
فى لحظة واحدة.....

عاشق

انا عاشق صمتك وكلامك ..

وباحس بفرحك وألامك .. 

ياما نفسى أشاركك أيامك ..
وأبقى معاك حتى فى أحلامك ..

ده جمالك أجمل من تحفه .. 

جيت أوصف مالقيتلوش وصفه ..

باتمنى أشوفك لو صدفه ..

وأحكيلك ع الشوق واللهفه ..

نفسى أعرف ليه قلبك قاسى ..

وأنا قلبى ف حبك بيقاسى ..

أصلك لو حاسس إحساسى ..

هاتبات فاكر تصبح ناسى ..

حبك ضحكنى وبكانى ..

حبك فكرنى ونسانى ..

حبك زعلنى وقسانى ..
حبك خلانى واحد تانى ..

لو هاحكى هاقول انت ظالمنى ..

من حبك عايز تحرمنى ..

ماتحن عليا وطمنى ..

ماهو بعدك عنى بيألمنى ..

مش هأقدر أغير تفكيرك ..

ولا هأقدر أكمل من غيرك ..

ولا هاطلب منك حنيه ..

أنا بس هاسيبك لضميرك..

أنا بس هاسيبك لضميرك..

انتخابات الإعادة...

خش وعلم على الميزان 

خش وعلم على السلم

سواء شفيق أو الإخوان

شعب مصر هايتألم

اللى هاينجح من الإتنين

هايولع مصر حريقة

بس لو إحنا يا ناس صاحيين

ناخد خطوة كده جريئة

يبقى هانعمل إيه يا شباب

دى المشكلة دى عويصه بجد

أنا حاسس أفكارى ضباب

وحلمى الوردى خلاص إتهد

نجح المرسى .. نجح المرشد

وبلدنا هاتحكمها جماعة

وشفيق مثله الأعلى مبارك

رحنا فى داهية خلاص يا جماعة

بس أوعوا تقولوا مش نازلين

لازم ننزل .. وماتنسوش

لو مانزلناش كده أصواتنا 

هاتروحح للى مايستاهلوش

يبقى هاننزل ونوريهم

نرضى ضميرنا ونبطل صوتنا

ونقول للى هاينجح فيهم

من تانى هاتبدأ ثورتنا

من تانى هاتبدأ ثورتنا

يامهون...

يامهون...هونها علينا
ثورتنا ...قامت بايدينا
وبلدنا...ماهى غاليه علينا
وعشانها...قومنا وضحينا
وخرجنا...نساند بعضينا
وأرواحنا...على كف ايدينا
ده ترابها... نفديه بعنينا
فى ميدانها...وقفنا احتجينا
فى شارعها...قومنا وصلينا
وعشانها... من القلب دعينا
يارب تحقق أمانينا
فى صعيدها...وفى بحرى وسينا
ده الشعب المصرى وأهالينا
صرخوا من الظلم اللى أذينا
يارب تحقق أمانينا
وماضاع حق ورائه مطالب
وأهو ربنا حقق المطالب
مسكوا الظالم واللى خاربها
ماهو كله لازم يتحاسب
أنا فرحان وهاموت من الفرحه
بلدى بتتغير بايديا
بس على الله تدوم الفرحه
وتعيش مصر بلدنا قويه
شهدائنا الابرار فى الجنه
وهانفضل ندعى ونتمنى
يارحمن ارحم شهدائنا
ماهو دول ماتوا يارب علشانا
يارب تبارك فى شبابنا
وتديم الأفراح على بابنا
وأنصرنا على من يعادينا
يارب تحقق أمانينا
يارب تحقق أمانينا

أخيرا...

يامصر قومتى... ياااااااااه أخيرا
ده أنا نسيت ان فيكى ناس ممكن تقوم
يا مصر نمتى كتير
وكان نفسى يجيلك حد يفوقك من النوم
فيكى يا مصر شباب جامد ومالهوش حل
شباب فايق.... شباب واعى...
شباب عايش فى ظلم وذل
بس كان هذا الشباب نايم
وشايل على أكتافه أطنان الهموم
وفجأه ... قرر يفوق ويتنفض
ويزيح من على أكتافه أطنان الهموم
قالوا يامصر انتى البهيه
قالوا يامصر انتى الأبيه
وفوق كل المحن لازم تخطى
ما انتى طول عمرك عظيمه
ما انتى طول عمرك كريمه
ما انتى طول عمرك قويه
ده أنا شاب مصرى يعنى لازم ينحنى ليا الزمان
وصوتى لازم يتسمع فى الكون ده كله
ما أنا أصلى كنت قاعد وساكت من زمان
بس لما أغضب وأثور مايكفينيش الكون ده كله
ومافيش ايدين تقدر تحوش اللى هايحصل
وكل ده من غير ما أخرب ولا حتى أكسر
أنا بس هاخرج فى الميدان وأبدى اعتراضى
وأقول بعلو الصوت:دى حكومه فساااااااد
هذا النظام انتهى عمره الافتراضى
وضاعت على ايديه حقوق كل العباد
ومش ماشى غير لما يمشى
وأدينى قاعد ومش راح أمشى
ماهو أصله لازم يمشى
علشان الشعب لما يثور
لازم... كلمته هى اللى تمشى